Norskprøve A1-B2
Øv til prøven
Norskprøven testar ikkje kunnskapen din, berre språk. Det er altså ikkje eit eige pensum til norskprøvane. Prøven måler kva språkleg nivå norsken din er på. Du øver deg til prøven ved å trene på norsk språk. Du kan òg bruke eksempeloppgåvene til å forberede deg.
Den beste måten å forbetre språket ditt på, er å bruke det. Du bør ikkje bruke tid på å memorere tekst. Prøven testar sjølvstendig språkleg forståing og språkbruk, så innlært tekst er ikkje særleg nyttig.
Du bør òg gjere deg kjent med innhaldet i prøven. Les om prøven og korleis han er bygd opp, og øv deg på eksempeloppgåvene vi har laga til kvar delprøve.
Eksempeloppgåvene viser alle dei ulike oppgåvetypane du vil få på delprøvane.
Når du øver på eksempeloppgåvene, blir du van med oppgåvetypane og veit korleis det fungerer når du skal løyse oppgåvene du får på prøvedagen.
Dette er berre eksempel. Du vil ikkje få desse oppgåvene på prøvedagen, men du vil få oppgåver som liknar.
Lytteprøven
Lytteprøven er basert på samtalar og meldingar fordi det er viktig at du kan klare deg i dagleglivet utanfor klasserommet.
Tekstane du skal lytte til, er korte og utan støy i bakgrunnen. Det er aldri meir enn to stemmer som snakkar i oppgåvene.
Tekstane du skal lytte til, er tilpassa nivået du tar prøven på.
Leseprøven
Tekstane du skal lese i leseprøven, er korte og tilpassa nivået du tar prøven på.
Skriveprøven
Skriveprøven testar kor godt du kan skrive norsk.
Munnleg prøve
Oppgåvene i den munnlege prøven (også kalla Prøven i munnleg kommunikasjon) handlar om å kunne snakke om ulike tema. Du skal kunne snakke både åleine og saman med ein annan person.
Du skal blant anna fortelje om deg sjølv på prøven.